ಇಂದಿನ ಡಿಜಿಟಲ್ ಯುಗದಲ್ಲಿ ಜೇಬಿನಲ್ಲಿ ಹಣವಿಲ್ಲದಿದ್ದರೂ, ಕೈಯಲ್ಲಿ ಒಂದು ಕ್ರೆಡಿಟ್ ಕಾರ್ಡ್ ಇದ್ದರೆ ಸಾಕು ಎನ್ನುವವರ ಸಂಖ್ಯೆ ಹೆಚ್ಚಾಗಿದೆ. ಕೇವಲ ಒಂದು ಸ್ಮಾರ್ಟ್ಫೋನ್ ಖರೀದಿಯಿಂದ ಹಿಡಿದು ಹೋಟೆಲ್ ಬಿಲ್ ಪಾವತಿಯವರೆಗೆ ಎಲ್ಲದಕ್ಕೂ ಸುಲಭವಾಗಿ ಸಿಗುವ ಸಾಲದ (EMI) ಮೊರೆ ಹೋಗುವುದು ಈಗ ಸಾಮಾನ್ಯ. ಆದರೆ, ಈ ಸಾಲ ಪಡೆಯಲು ಅತ್ಯಂತ ಪ್ರಮುಖವಾಗಿ ಬೇಕಿರುವ ‘ಕ್ರೆಡಿಟ್ ಸ್ಕೋರ್’ (Credit Score) ಕುರಿತು ಜನರಲ್ಲಿ ಒಂದು ದೊಡ್ಡ ಗೊಂದಲವಿದೆ.
“ನನ್ನ ಸಿಬಿಲ್ ಸ್ಕೋರ್ ಎಷ್ಟಿದೆ ಎಂದು ಪದೇ ಪದೇ ಚೆಕ್ ಮಾಡಿದರೆ, ಸ್ಕೋರ್ ಕುಸಿಯುತ್ತದೆಯಾ?” ಎಂಬ ಪ್ರಶ್ನೆ ಹಲವರನ್ನು ಕಾಡುತ್ತಿದೆ. ಈ ಗೊಂದಲದ ಹಿಂದಿನ ಅಸಲಿ ಸತ್ಯವೇನು ಎಂಬುದರ ಸ್ಪಷ್ಟ ಮಾಹಿತಿ ಇಲ್ಲಿದೆ.
ಪದೇ ಪದೇ ಚೆಕ್ ಮಾಡಿದರೆ ಸ್ಕೋರ್ ಇಳಿಯುವುದು ನಿಜವೇ?
ಕುತೂಹಲಕ್ಕೋ ಅಥವಾ ಬ್ಯಾಂಕ್ನಲ್ಲಿ ಸಾಲ ಸಿಗುತ್ತದೆಯೋ ಇಲ್ಲವೋ ಎಂದು ತಿಳಿಯುವ ಆತುರದಲ್ಲೋ, ಬಹುತೇಕರು ವಿವಿಧ ಆ್ಯಪ್ ಅಥವಾ ವೆಬ್ಸೈಟ್ಗಳಲ್ಲಿ ತಮ್ಮ ಕ್ರೆಡಿಟ್ ಸ್ಕೋರ್ ಪರಿಶೀಲಿಸುತ್ತಿರುತ್ತಾರೆ. ಹೀಗೆ ಆಗಾಗ್ಗೆ ಚೆಕ್ ಮಾಡುವುದರಿಂದ ಸ್ಕೋರ್ ಕಡಿಮೆಯಾಗುತ್ತದೆ ಎಂಬುದು ಹಲವರ ಬಲವಾದ ನಂಬಿಕೆ.
ಆದರೆ ವಾಸ್ತವದಲ್ಲಿ, ಇದು ಸಂಪೂರ್ಣ ಸುಳ್ಳು. ನೀವು ನಿಮ್ಮ ಸ್ವಂತ ಕ್ರೆಡಿಟ್ ಸ್ಕೋರ್ ಅನ್ನು ಎಷ್ಟು ಬಾರಿ ಚೆಕ್ ಮಾಡಿದರೂ ನಿಮ್ಮ ಸ್ಕೋರ್ ಮೇಲೆ ಯಾವುದೇ ನಕಾರಾತ್ಮಕ ಪರಿಣಾಮ ಬೀರುವುದಿಲ್ಲ. ಆರ್ಥಿಕ ಭಾಷೆಯಲ್ಲಿ ಇದನ್ನು ‘ಸಾಫ್ಟ್ ಇನ್ಕ್ವೈರಿ’ (Soft Inquiry) ಎಂದು ಕರೆಯಲಾಗುತ್ತದೆ. ಇದು ಕೇವಲ ನಿಮ್ಮ ಮಾಹಿತಿಗಾಗಿ ಮಾಡುವ ಪರಿಶೀಲನೆಯಾಗಿರುವುದರಿಂದ ಇದರಿಂದ ಸಿಬಿಲ್ (CIBIL) ಕುಸಿಯುವುದಿಲ್ಲ.
ಹಾಗಾದರೆ ಕ್ರೆಡಿಟ್ ಸ್ಕೋರ್ ಕುಸಿಯುವುದು ಯಾವಾಗ?
ನಿಮ್ಮ ಸ್ವಂತ ಪರಿಶೀಲನೆಯಿಂದ ಸ್ಕೋರ್ ಕುಸಿಯುವುದಿಲ್ಲವಾದರೂ, ನಿಮ್ಮ ಕೆಲವು ತಪ್ಪುಗಳಿಂದ ರೇಟಿಂಗ್ ಪಾತಾಳಕ್ಕೆ ಇಳಿಯುವ ಸಾಧ್ಯತೆಗಳಿರುತ್ತವೆ:
- ಬ್ಯಾಂಕ್ಗಳ ಪರಿಶೀಲನೆ (Hard Inquiry): ನೀವು ಸಾಲಕ್ಕಾಗಿ ಅಥವಾ ಹೊಸ ಕ್ರೆಡಿಟ್ ಕಾರ್ಡ್ಗಾಗಿ ಬ್ಯಾಂಕ್ ಅಥವಾ ಹಣಕಾಸು ಸಂಸ್ಥೆಗಳಿಗೆ ಅಧಿಕೃತವಾಗಿ ಅರ್ಜಿ ಸಲ್ಲಿಸಿದಾಗ, ಆ ಸಂಸ್ಥೆಗಳು ನಿಮ್ಮ ಕ್ರೆಡಿಟ್ ಹಿಸ್ಟರಿಯನ್ನು ಪರಿಶೀಲಿಸುತ್ತವೆ. ಇದನ್ನು ‘ಹಾರ್ಡ್ ಇನ್ಕ್ವೈರಿ’ ಎನ್ನಲಾಗುತ್ತದೆ. ಬ್ಯಾಂಕ್ಗಳು ಹೀಗೆ ಚೆಕ್ ಮಾಡಿದಾಗ ನಿಮ್ಮ ಸ್ಕೋರ್ ಮೇಲೆ ಪರಿಣಾಮ ಬೀರುತ್ತದೆ.
- ಏಕಕಾಲದಲ್ಲಿ ಹಲವು ಅರ್ಜಿಗಳು: ಸಾಲ ಬೇಗ ಸಿಗಲಿ ಎಂದು ಒಂದೇ ಬಾರಿಗೆ ನಾಲ್ಕೈದು ಬ್ಯಾಂಕ್ಗಳಿಗೆ ಅರ್ಜಿ ಸಲ್ಲಿಸಿದರೆ, ಎಲ್ಲಾ ಬ್ಯಾಂಕ್ಗಳು ಏಕಕಾಲಕ್ಕೆ ನಿಮ್ಮ ಸ್ಕೋರ್ ಚೆಕ್ ಮಾಡುತ್ತವೆ. ಇದರಿಂದ ನೀವು ಸಾಲಕ್ಕಾಗಿ ಹತಾಶರಾಗಿದ್ದೀರಿ (Credit Hungry) ಎಂಬ ಸಂದೇಶ ರವಾನೆಯಾಗಿ, ನಿಮ್ಮ ಕ್ರೆಡಿಟ್ ಸ್ಕೋರ್ ಭಾರಿ ಪ್ರಮಾಣದಲ್ಲಿ ಕುಸಿಯುತ್ತದೆ.
ನೆನಪಿರಲಿ: ಬ್ಯಾಂಕ್ಗಳ ವಿಚಾರಣೆಯಿಂದ ಕುಸಿಯುವ ಸ್ಕೋರ್ ತಾತ್ಕಾಲಿಕವಾಗಿರುತ್ತದೆ. ಆದರೆ, ಸಕಾಲದಲ್ಲಿ ಇಎಂಐ (EMI) ಪಾವತಿಸದಿರುವುದು ನಿಮ್ಮ ಸ್ಕೋರ್ ಅನ್ನು ಶಾಶ್ವತವಾಗಿ ಹಾಳುಮಾಡುತ್ತದೆ. ಆದ್ದರಿಂದ, ನಿಮ್ಮ ಸ್ಕೋರ್ ಅನ್ನು ನೀವೇ ಚೆಕ್ ಮಾಡಿಕೊಳ್ಳಲು ಯಾವುದೇ ಅಂಜಿಕೆ ಬೇಡ, ಆದರೆ ಸುಖಾಸುಮ್ಮನೆ ಎಲ್ಲೆಂದರಲ್ಲಿ ಸಾಲಕ್ಕೆ ಅರ್ಜಿ ಹಾಕುವುದನ್ನು ನಿಲ್ಲಿಸಿ.
ಇತರೆ ಮಾಹಿತಿಗಳನ್ನು ಓದಿ:
