ಬೆಂಗಳೂರು: ರಾಜ್ಯದಲ್ಲಿ ಅಕ್ರಮವಾಗಿ ಬಿಪಿಎಲ್ (BPL) ರೇಷನ್ ಕಾರ್ಡ್ ಹೊಂದಿರುವವರಿಗೆ ಆಹಾರ ಮತ್ತು ನಾಗರಿಕ ಸರಬರಾಜು ಇಲಾಖೆ ದೊಡ್ಡ ಆಘಾತ ನೀಡಿದೆ. ಕಳೆದ ಮೂರು ತಿಂಗಳಲ್ಲಿ ಇಲಾಖೆ ನಡೆಸಿದ ಗುಪ್ತ ಕಾರ್ಯಾಚರಣೆಯಲ್ಲಿ ಬರೋಬ್ಬರಿ 4.10 ಲಕ್ಷ ಕುಟುಂಬಗಳಿಗೆ ಬಿಸಿ ಮುಟ್ಟಿಸಲಾಗಿದೆ.
2025 ರ ಸೆಪ್ಟೆಂಬರ್ 03 ರಿಂದ ಡಿಸೆಂಬರ್ 14 ರವರೆಗೆ ನಡೆದ ಈ ‘ಮೆಗಾ ಆಪರೇಷನ್’ನ ವರದಿ ಇದೀಗ ಬಹಿರಂಗವಾಗಿದ್ದು, ಅನರ್ಹ ಕಾರ್ಡ್ದಾರರ ನಿದ್ದೆಗೆಡಿಸಿದೆ.
ಪ್ರಮುಖ ಹೈಲೈಟ್ಸ್ :
- 15,056 ಕಾರ್ಡ್ ರದ್ದು: ನಿಯಮ ಮೀರಿ ಬಿಪಿಎಲ್ ಕಾರ್ಡ್ ಪಡೆದಿದ್ದ 15,056 ಕಾರ್ಡ್ಗಳನ್ನು ಕಳೆದ 3 ತಿಂಗಳಲ್ಲಿ ಸಂಪೂರ್ಣವಾಗಿ ರದ್ದುಗೊಳಿಸಲಾಗಿದೆ (Cancelled).
- 4 ಲಕ್ಷ ಕಾರ್ಡ್ ಎಪಿಎಲ್ಗೆ: ಬರೋಬ್ಬರಿ 3.90 ಲಕ್ಷ ಬಿಪಿಎಲ್ ಕಾರ್ಡ್ಗಳನ್ನು ಅನರ್ಹ ಎಂದು ಪರಿಗಣಿಸಿ, ಅವುಗಳನ್ನು ಎಪಿಎಲ್ (APL) ಕಾರ್ಡ್ಗಳಾಗಿ ಬದಲಾಯಿಸಲಾಗಿದೆ.
- 5,632 ಕಾರ್ಡ್ ಅಮಾನತು: ಅನುಮಾನಾಸ್ಪದ ಎಂದು ಕಂಡುಬಂದಿರುವ 5,632 ಕಾರ್ಡ್ಗಳನ್ನು ವಿಚಾರಣೆಗಾಗಿ ಕಾಯ್ದಿರಿಸಲಾಗಿದ್ದು, ತಾತ್ಕಾಲಿಕವಾಗಿ ಅಮಾನತು (Suspended) ಮಾಡಲಾಗಿದೆ.
- ಒಟ್ಟು 14 ಲಕ್ಷ ಜನರಿಗೆ ಕುತ್ತು: ಈ ಕಾರ್ಯಾಚರಣೆಯಲ್ಲಿ ಒಟ್ಟು 14 ಲಕ್ಷ ಅಕ್ರಮ ಫಲಾನುಭವಿಗಳು ಪತ್ತೆಯಾಗಿದ್ದಾರೆ ಎಂದು ಇಲಾಖೆ ಮೂಲಗಳು ತಿಳಿಸಿವೆ.
ಕಳೆದ 90 ದಿನಗಳ ಅವಧಿಯಲ್ಲಿ ನಿಯಮ ಮೀರಿ ಬಿಪಿಎಲ್ ಕಾರ್ಡ್ ಪಡೆದಿದ್ದ 15,056 ಕಾರ್ಡ್ಗಳನ್ನು ರಾಜ್ಯಾದ್ಯಂತ ಶಾಶ್ವತವಾಗಿ ರದ್ದುಗೊಳಿಸಲಾಗಿದೆ. ವಿಷಯ ಇಷ್ಟಕ್ಕೆ ನಿಂತಿಲ್ಲ, ಬಡತನ ರೇಖೆಗಿಂತ ಮೇಲಿದ್ದರೂ (ಶ್ರೀಮಂತರಾಗಿದ್ದರೂ) ಬಿಪಿಎಲ್ ಕಾರ್ಡ್ ಬಳಸುತ್ತಿದ್ದ ಸುಮಾರು 3.90 ಲಕ್ಷ ಕುಟುಂಬಗಳ ಕಾರ್ಡ್ಗಳನ್ನು ಏಕಾಏಕಿ ‘ಎಪಿಎಲ್’ (APL) ಕಾರ್ಡ್ಗಳನ್ನಾಗಿ ಬದಲಾವಣೆ ಮಾಡಲಾಗಿದೆ.
ಇದರೊಂದಿಗೆ, ಅನುಮಾನಾಸ್ಪದ ಎಂದು ಕಂಡುಬಂದಿರುವ ಇನ್ನೂ 5,632 ಕಾರ್ಡ್ಗಳನ್ನು ಮುಂದಿನ ವಿಚಾರಣೆಗಾಗಿ ಕಾಯ್ದಿರಿಸಲಾಗಿದ್ದು, ಸದ್ಯಕ್ಕೆ ಅವುಗಳನ್ನು ಅಮಾನತು (Suspended) ಮಾಡಲಾಗಿದೆ.
ಒಟ್ಟಾರೆ ಈ ಕಾರ್ಯಾಚರಣೆಯಲ್ಲಿ ಸುಮಾರು 14 ಲಕ್ಷ ಅಕ್ರಮ ಫಲಾನುಭವಿಗಳನ್ನು ಇಲಾಖೆ ಪತ್ತೆಹಚ್ಚಿದೆ. ರಾಜ್ಯದ ಜನಸಂಖ್ಯೆಗೆ ಹೋಲಿಸಿದರೆ ಶೇ.73 ರಷ್ಟು ಕುಟುಂಬಗಳು ಬಿಪಿಎಲ್ ಕಾರ್ಡ್ ಹೊಂದಿವೆ.
ಆದರೆ ವಾಸ್ತವವಾಗಿ ಇದು ಶೇ.50 ರಷ್ಟು ಇರಬೇಕಿತ್ತು ಎಂದು ಕೇಂದ್ರ ಸರ್ಕಾರವೇ ರಾಜ್ಯಕ್ಕೆ ಎಚ್ಚರಿಕೆ ನೀಡಿತ್ತು. ಸುಮಾರು 7.75 ಲಕ್ಷ ಶಂಕಾಸ್ಪದ ಫಲಾನುಭವಿಗಳ ಪಟ್ಟಿಯನ್ನು ಕೇಂದ್ರವೇ ರಾಜ್ಯಕ್ಕೆ ನೀಡಿದ ಬಳಿಕ ಈ ಕಠಿಣ ಕ್ರಮ ಕೈಗೊಳ್ಳಲಾಗಿದೆ.
ಇನ್ನೊಂದೆಡೆ, ಬಿಪಿಎಲ್ ಕಾರ್ಡ್ ಆದಾಯ ಮಿತಿಯ ಮೇಲೂ ತೂಗುಗತ್ತಿ ನೇತಾಡುತ್ತಿದೆ. “ದಿನಗೂಲಿ ನೌಕರರು ದಿನಕ್ಕೆ 500 ರೂ. ದುಡಿದರೂ ವರ್ಷಕ್ಕೆ 1.80 ಲಕ್ಷ ರೂ. ಆದಾಯವಾಗುತ್ತದೆ. ಆದರೆ ಈಗಿರುವ ಬಿಪಿಎಲ್ ಮಿತಿ 1.20 ಲಕ್ಷ ರೂ. ಮಾತ್ರ. ಹೀಗಾಗಿ ಇದನ್ನು ಪರಿಷ್ಕರಿಸುವ ಚಿಂತನೆ ಇದೆ,” ಎಂದು ಆಹಾರ ಸಚಿವ ಕೆ.ಎಚ್. ಮುನಿಯಪ್ಪ ಸುಳಿವು ನೀಡಿದ್ದಾರೆ.
ಹೀಗಾಗಿ, ನಿಮ್ಮ ಕಾರ್ಡ್ ರದ್ದಾಗಿದೆಯೇ ಅಥವಾ ಎಪಿಎಲ್ ಆಗಿ ಬದಲಾಗಿದೆಯೇ ಎಂಬುದನ್ನು ಇಲಾಖೆಯ ವೆಬ್ಸೈಟ್ ಅಥವಾ ನ್ಯಾಯಬೆಲೆ ಅಂಗಡಿಯಲ್ಲಿ ಕೂಡಲೇ ಖಚಿತಪಡಿಸಿಕೊಳ್ಳಿ.
ರಾಜ್ಯದಲ್ಲಿ ಸದ್ಯ ಇರುವ ಕಾರ್ಡ್ಗಳು:
- ಸಕ್ರಿಯ ಬಿಪಿಎಲ್ ಕಾರ್ಡ್: 1,13,56,089
- ಅಂತ್ಯೋದಯ ಕಾರ್ಡ್: 42,94,924
- ಒಟ್ಟು ರೇಷನ್ ಕಾರ್ಡ್: 1,53,65,889
ಇತರೆ ಮಾಹಿತಿಗಳನ್ನು ಓದಿ:
Gruhalakshmi Scheme: ಗೃಹಲಕ್ಷ್ಮಿಯರಿಗೆ ‘ನ್ಯೂ ಇಯರ್ ಗಿಫ್ಟ್’: ಖಾತೆಗೆ ಜಮಾ ಆಯ್ತು ₹2,000!